Gjesdalsstøylen, Søstestøylen og Gjesdalsvatnet

Dette er ein flat tur i ein nydeleg fjelldal som du går på godt opptrakka stiar. Turen startar på parkeringsplassen på Trinta. Du brukar 5-10 minutt til Gjesdalsstøylen. Vegen går vidare på god sti, der du går over ein del mindre bekkar, før du passerer elva, som renn frå Gjesdalsvatnet. Det er god bru over elva like før du går opp på Søstestøylen. Frå støylen får du god utsikt over store delar av Gjesdalsdalen.Du brukar kring 15-20 minuttar inn her frå Gjesdalsstøylen.

Du går attende over brua og inn att på stien der du tok av mot Søstestøylen. Du går i austleg retning på god sti i myrlendt, oversiktleg og opeterreng. Etter periodar med mykje regn kan det vere nokre parti som er våte å passere. Gjesdalsvatnet opnar seg plutseleg framfor deg. Du brukar kring 45-60 min inn til vatnet.Om du vil kan du gå langs den nordlege sida av vatnet over skaret mot Sandalen, og ned mot Botnavatnet.

Om vinteren er det flott å gå den same turen på fjellski. Du må då starte turen ved gardane der skogsvegen tek til i Gjesdalen.