Ålhusstøylen og Grøneneven

Turen startar i gardstun på Ålhus rett nord for kyrkja på Ålhus. Du startar med å gå på slakt stigande skogsveg innover dalføret. Etter ei stund går skogsvegen bratt oppover mot Ålhusstøylen. Skogsvegen endar på støylen, der du får flott utsikt over Jølstravatnet, Ålhus og grenda Sandal på andre sida av vatnet. Turen på skogsvegen opp til støylen er enkel å gå, og tek omlag 45-60 minutt. Turen til støylen er gradert som grøn, og høver for barnefamiliar å gå.

For å kome til Grøneneven går du i nordleg retning etter støylen. Frå du forlet skogsvegen på støylen går du no i myrlendt og noko bratt terreng heilt opp. Det er ikkje tydeleg sti, men den vart merka som fjelltrim i 2019. Pga. dette finn du nokre raude merke å følgje i terrenget både opp og ned. Noko tung mark å gå i oppover. Det er ingen elvepasseringar. Turen frå støylen tek omlag 45-60 minutt. Flott utsiktspunkt på toppen.