Bokprat på Rennesøy: Kristin Aalen om Torturisten fra Bergen

Monster eller menneske.

Kan me alle bli omsynslause torturistar om me hamnar i feil miljø?

Før andre verdskrigen arbeidde Max Rook som murar i Bergen. Ved starten av krigen hamna han som tolk hos Gestapo, det hemmelege tyske tryggingspolitiet i byen. I løpet av få år vart han ein brutal torturist i møte med norske motstandsfolk. Fleire av offera kom frå Rogaland. I landssvikoppgjeret etter krigen vart Rook dømd til døden og skoten.

Var han eit monster og eit udyr slik mange såg på han den gongen, eller kunne dette skjedd med fleire? Kristin Aalen, forfattar og tidlegare Aftenbladjournalist, har gått gjennom landssvikmappa til Rook. Som ektefelle av eit av barnebarna til landssvikaren har ho fått tilgang på minne frå etterkommarane hans. I tillegg trekkjer ho inn forsking av sosialpsykologar, filosofar og etikarar for å sirkla inn korleis eit heilt vanleg menneske kan gjera seg skuldig i grufulle handlingar.

Onsdag 29. januar kl. 18.00 held Aalen eit foredrag om boka "Torturisten frå Bergen. Max Rook, dødsdømt etter å ha tent Gestapo" på Rennesøy bibliotek. Velkommen!