Den kjempestore pæra

Ein eventyrleg musikal for heile familien

Når idyllen i Solby blir truga av viseborgarmeister Kvist, må katten Mitcho og elefanten Sebastian redde småbyen frå å bli ein trist plass å bu. Med ei kjempestor pære som båt seglar dei av garde for å finne den sakna borgarmeisteren JB. På vegen møter dei sabelsvingande piratar, ein skummel sjødrage og uhyggjelege spøkelse, men òg farar som kanskje ikkje er så farlege likevel. Passar for born frå fem år og oppover – for dette blir teatermoro for heile familien!

Det fargerike, fantasifulle og sprø universet til Jakob Martin Strid har funne vegen til mange bokhyller, og teaterversjonen av «Den utrulege historia om den kjempestore pæra» blir minst like fartsfylt og humoristisk som boka ho er basert på. I tillegg til mystikk, mot og moro, er framsyninga lasta med songar og musikk av Julian Berntzen.

Med andre ord ligg alt til rette for ein pærefekt kveld på teateret.

Framsyninga er eit samarbeid mellom Det Vestnorske Teateret og Den Nationale Scene. Produsert etter avtale med Songbird Agency og Gyldendal Group Agency København.