Litle Høydal - Simavatnet

Køyr forbi "sentrum" i Litle Høydal, ta av frå hovudvegen Fv 542 på 2. avkøyrsla mot venstre. Bilveg fram til garden Hilleren som no er under oppussing/ombygging. Parker bilen der og gå vidare på skogsveg forbi murar etter gamale gardsbruket Lia og vidare til enden på skogsvegen. Frå skogsvegen går det godt synleg sti mot venstre i slakk motbakke til Høydalsmyrane og Høydalsstølen, der er ikkje hus på stølen. Her møter du stien som kjem frå Store Høydal. Følg stien, som også går til Håsteinen/Høydalsnipa. Gå over ei lita bru og vidare langs Høydalsvatnet. Der stien deler seg, ved skilt til Håsteinen ( T ), tek du til høgre på god sti gjennom fin bjørkeskog. Terrenget blir her brattare, men fint å gå. Stigning på omlag 200 høgdemeter frå Høydalsvatnet til du kjem opp og terrenget flatar ut. Undervegs er der ei fantastisk utsikt mot Høydalsvatnet, Florø og øyane i vest. Simavatnet og gjetarhytta kjem til syne når du er komen opp over det bratte partiet. Simahytta er eigd av Standal beitelag. Det er fint å gå vidare herfrå og opp på Håsteinen/Høydalsnipa.

Første del av sporet er teikna inn. Frå brua og opp er sporet gått.