Støvringsstøylen frå Dalavatnet

Turen startar på Støfring ved idylliske Dalavatnet. Du går på fin og brei skogsveg heilt opp til støylstomta. På veg opp går du i fin og open furuskog og finn fine kvileplassar på gamle kvilesteinar. Skogsvegen går i jamn og fin stigning oppover lia, der du krysser nokre små grover med sildrande vatn innomellom. Frå støylstomta, som er godt rydda for skog, får du svært god utsikt over Vassenden og inn mot Jølstravatnet.

Turen høver godt for turgåarar som ønskjer å finne stiar som ikkje er så bratte og krevjande. Ruta passar derfor godt til småbarnsfamiliar og andre som likar litt rolegare terreng. Skogsvegen eignar seg òg godt for jogging i lettare terreng.

Turen går i område med ein del beitedyr i sommarhalvåret. Så respekter bandtvang og lat att alle grindar etter deg.